Meesterklasse

Meesterklas 1 Beskrywing
Vind jou filmstem.
Aangebied deur prof. Lieza Louw en Karin Preller
Sien, voel en hoor jou film.’ Idees vir artistieke en kreatiewe identeitsontwikkeling vir jong filmmakers. Kom saam op dié kolletiewe reis met skilder/teken en filmies-gebaseerde tegnieke en leer hoe om jou eie identiteit as ‘n filmmaker te ontdek.
Meesterklas 2 Beskrywing
Wesgro bied aan: Ontmoet Todd Brown, Hoof van internasionale aankope, XYZ Films ‘n Uur lange meesterklas oor hoe om jou film vir internasionale verkoops- en verspreidingsgeleenthede te verpak.
Meesterklas 3 Beskrywing
Hoe beplan ek my feesstrategie. Aangebied deur Jana Wolff Hierdie meesterklas verduidelik hoe die blootstelling by ’n filmfees jou film kan baat, wat jy moet weet oor feeste, wat ’n goeie strategie is, hoe en wat om voor te berei en hoe om die maksimum voordeel uit jou fees se vertoning by ’n fees te trek.
Meesterklas 4 Beskrywing
Internasionale filmfeeste & kortfilms.
Aangebied deur Wouter Jansen
Met soveel filmfeeste en nuwes wat gedurig opskiet, is dit moeilik om te besluit wat die beste vir jou en jou film sal werk. Waar en wanneer begin jy terwyl jy nog aan jou film werk? By watter feeste wil jy eerste wys en watter keuses maak jy ná die première? Hoe kry jy die meeste uit die feeste waar jou film wys? Watter moontlikhede is daar om jou film aanlyn te versprei en te vertoon? Wouter sal al hierdie vrae beantwoord en verduidelik wat die beste strategie is om soveel blootstelling moontlik vir jou kortfilm te kry. Dié meesterklas sluit ‘n spesiale vertoning van My mamma is Bossies in wat internasionaal deur Square Eyes versprei is.
Meesterklas 5 Beskrywing
Gehoorontwikkeling deur middel van kort video’s op TikTok Carla Harris, hoof van mediavennootskappe vir TikTok in Sub-Sahara-Afrika, deel haar kennis oor die groot verskeidenheid van moontlikhede wat die TikTok-app se funksies aan filmmakers bied. Sy verduidelik hoe jy ’n gehoor en gemeenskap rondom jou kortvideokuns kan skep wat finansieel winsgewend op TikTok en in die breër ekonomie kan wees.
Meesterklas 6 Beskrywing
Die skep van ’n winsgewende YouTube-kanaal Danilo Acquisto, HUB en medestigter van Special Effects Media South Africa, deel die basiese beginsels van YouTube en gee raad oor hoe om jou gehoor (kanaal en handelsmerk) uit te bou en die verskillende maniere waarop jy geld uit jou YouTube-inhoud kan verdien. Suksesvolle YouTubers kry die geleentheid om hul ervaring te deel.

SSF-paneelbesprekings

Onderwerp Beskrywing Paneellede Tyd
M-Net Studios bied aan: Ko-produksiegeleenthede en -strategieë Ko-produksies het die manier verander waarop televisie gemaak word en lyk na die toekoms van die bedryf. Sluit by hierde gesprek aan om uit te vind hoeveel internasionale belangstelling daar in Suid-Afrikaanse ko-produksies is, waar daar geleenthede is en hoe om jou kreatiewe voorleggings en finansieringsplanne te struktureer. Nicola van Niekerk (fasiliteerder).
Allan Sperling, Harriet Gavshon, Kaye Ann Williams, Thierry Cassuto, Layla Swart, Nomsa Philiso
13:45-14:45
Onderwerp Beskrywing Paneellede Tyd
Vroue in die filmbedryf Vrouevervaardigers in die rolprent- en TV-bedryf deel hul ervarings en praat oor hul impak op die bedryf en hoe om geleenthede te benut en uitdagings te omhels. Kaye Ann Williams (fasiliteerder).
Vlokkie Gordon, Thandi Davids, Amy Jephta, Layla Swart
13:45-14:45
Onderwerp Beskrywing Paneellede Tyd
Verspreiding van plaaslike films gedurende ‘n globale pandemie. Aangebied deur Helen Kuun van Indigenous-filmverspreiding Die pandemie laat filmmakers met ‘n dilemma: Neem ek die risiko en stel my plaaslike speelfilm of dokumentêr in teaters vry in die wete dat sommige Covid-protokolle en -beperkings nog in plek mag wees wat die gehoor en dus ook die loketinkomste beperk, of wag ek? As ek wel besluit om te versprei, wat kan ek van so ‘n uitreiking verwag? En hoe ondersteun en bemark ek my vrygestelde film as ‘n vervaardiger of filmmaker? Helen Kuun (fasiliteerder).
Tanya Rossouw, Christeen Willemse, Thandeka Zwana
12:00-13:00
Internasionale verteenwoordiging vir draaiboekskrywers en regisseurs. Aangebied deur Wikus du Toit ‘n Gesprek oor internasionale verteenwoordiging in die TV- en filmbedryf met top-agente uit Suid-Afrika en die Verenigde Koninkryk. Vind uit: Hoe reik ek uit en kry verteenwoordiging? Wat is die slaggate? Waarna soek alteljees en platforms en wat behels verteenwoordiging? Wat is die internasionale tendense in skryfwerk vir TV en film? Wikus du Toit (fasiliteerder).
David Kayser, Anthony Merstriner, Aiofe Lennon-Ritchie
16:00-17:00

Sprekers

Allan Sperling is oorspronklik van Denemarke, maar woon tans in Johannesburg. Hy is die uitvoerende hoof van produksie by MultiChoice en is verantwoordelik vir die medeproduksie, post-produksie, ontwikkeling, finansies en distribusie van verskeie projekte.

Amy Jephta is ’n draaiboekskrywer, regisseur en dramaturg van Mitchells Plein, Kaapstad. Sy het drie speelfilms agter haar naam, insluitend Suid-Afrika se inskrywing vir die 2018 Golden Globes, Ellen: Die storie van Ellen Pakkies. As dramaturg is van haar werk onder regie van Danny Boyle by die Royal Court opgevoer. Sy is die 2017-wenner van die Eugène Marais-prys, en die 2019-ontvanger van die gesogte Standard Bank Jong Kunstenaar-toekenning in die drama-kategorie. Sy fokus tans op die vervaardiging van film en televisie via haar onderneming, Nagvlug Films. Haar hoog aangeskrewe speelfilmdebuut as skrywer-regisseur, Barakat, was Suid-Afrika se inskrywing vir die 2022 Oscars.

Anthony Mestriner het vir 15 jaar as film-en-televisie-outeursagent by Casarotto Ramsay & Associates in London gewerk – een van die wêreld se mees gesogte agentskappe om skrywers, regisseurs, departementshoofde en regte te verteenwoordig. Huidige kliënte is onder meer Edward Berger (Melrose), Otto Bathurst (Peaky Blinders), Miguel Sapochnik (Game of Thrones), Nora Fingscheidt (The Unforgivable) en Duncan Macmillan (1984). Voor hy ‘n agent geword het, het Anthony by Spyglass Entertainment in Los Angeles gewerk. Hy het aan die filmskole van Southern Methodist University en UCLA studeer.

Aoife Lennon-Ritchie is ‘n besturende vennoot by Torchwood, ’n outeurs- en werwingsagentskap met kantore in Kaapstad en Johannesburg. Saam met haar vennoot, David Kayser, verteenwoordig sy opkomende asook internasionaal erkende skrywers, regisseurs, draaiboekskrywers en uitgesoekte televisie- en filmvervaardigers. Aoife bestuur ook die Lennon-Ritchie Agency wat skrywers internasionaal verteenwoordig en filmregte en internasionale uitgewersregte verkoop namens Suid-Afrikaanse en oorsese uitgewers insluitend Penguin Random House South Africa, Pan Macmillan South Africa, Jonathan Ball Publishers en Duck Creek Press New Zealand.

Carla Harris is die hoof van mediavennootskappe vir TikTok in Sub-Sahara-Afrika. Haar fokus is om die groei van media, vermaak, sport en ander inhoudsgedrewe organisasies op TikTok te ondersteun. Saam met haar span, wat vanaf dwarsoor Afrika werk, help Carla mediavennote om nuwe gehore te bereik en om gemeenskappe rondom hulle handelsmerke en ondernemings te skep op TikTok – organies en deur middel van vennootskapsprojekte. Potensiële aanhangers en gehore is reeds op TikTok. Carla en haar span help hul vennote om deel te word van daardie gesprekke.

Voordat Carla by TikTok begin het, was sy ’n senior inhoudspesialis vir aanlyn video by MultiChoice, asook die multikanaalbestuurder van al MultiChoice se YouTube-kanale. Sy was nie net een van die eerste YouTube-multikanaalbestuurders in Suid-Afrika nie, maar ook die eerste multikanaalbestuurder van ’n uitsaaier in die EMEA-streek wat YouTube se Player for Publishers begin gebruik het. Deur haar werk met verskeie handelsmerke in die MultiChoice-stal – van SuperSport tot Africa Magic – het Carla ervaring opgedoen as platformbestuurder én inhoudskepper. Sy beskik dus oor indieptekennis van alle aspekte van die aanlyn video-ekosisteem.

Christeen Willemse het haar loopbaan in 2011 by Ster-Kinekor begin as die kliënteverhoudingsbestuurder vir Gauteng. In dié posisie het sy waardevolle ervaring opgedoen en insig in verbruikersgedrag gekry. ’n Jaar later het sy na Kaapstad geskuif waar sy nou Ster-Kinekor se streeksbemarkingshoof is vir ’n gebied wat ook Namibië en Zambië insluit.

Danilo Acquisto is die hoof- uitvoerende beampte en medestigter van aanlyn video-spesialisonderneming en YouTube MCN, Special Effects Media South Africa. Voor sy televisie- en radioproduksieloopbaan het hy 10 jaar in video- en oudiomedia gewerk. Hy het begin as aanbieder op televisieprogramme soos Hectic Nine-9, Afternoon Express en Win a Home en radioprogramme soos die Hit 30 op Goeie Hoop FM. In 2017 het hy ’n vennootskap met ’n internasionale YouTube MCN aangegaan om ’n plaaslike aanbieding te loods.

David Kayser is ’n outeursagent gevestig in Johannesburg, Suid-Afrika. Hy het vir die grootste gedeelte van die laaste tien jaar in Londen by Casarotto Ramsay & Associates Ltd gewerk – een van die wêreld se voorste kreatiewe agentskappe wat opkomende sowel as internasionaal erkende skrywers, regisseurs en departementshoofde in film, televisie en teater verteenwoordig.

Dorothee Wenner is ’n Berlynse vryskutfilmvervaardiger, filmkurator en skrywer. Sy is ’n eksterne kurator by die Humboldt Forum vir Film en Bioskoop, en ’n afgevaardigde van die Berlyn Internasionale Filmfees vir die Afrika-streek suid van die Sahara. Dorothee is lid van die beoordelaarspaneel van die in Lagos gevestigde Afrika Akademietoekennings sedert die ontstaan van hierdie toekennings in 2005. Haar jongste werk as filmvervaardiger is die webreeks Kinshasa Collection (www.kinshasa-collection.com).

Harriet Gavshon bestuur Quizzical Pictures – een van Suid-Afrika se voorste film-en-televisiemaatskappye. Sy het 25 jaar se ervaring in vervaardiging en het van Suid-Afrika se mees gevierde en geliefde televisieproduksies op haar kerfstok, onder meer, Soul City, iNumber, Diamond City en The Girl from St Agnes.

Dokumentêre/feiteprogramme wat sy vervaardig het, sluit in Masterchef South Africa en A Country Imagined met Johnny Clegg. Mees onlangs het sy saam met Serena Cullen aan die dramareeks Reyka gewerk, waarvan die regte verkoop is in meer as 80 lande. Sy het die Crystal-toekenning vir vroue met dapperheid en visie van die Women in Film-organisasie ontvang asook ’n spesiale toekenning as vroueveteraankunstenaar by die Departement van Kuns en Kultuur.

Helen Kuun is die besturende direkteur van Indigenous Film Development and Distribution. Sy het die maatskappy gestig in 2009 as die eerste onafhanlike filmverspreidingsmaatskappy gerig op verspreiding van rolprente wat in Suid-Afrika en Afrika vervaardig is. Sy het meer as 25 jaar se ervaring in alle aspekte van filmverspreiding in Suid-Afrika oor alle platforms heen van publisiteit en bemarking tot aankope, ontwikkeling en verkope. Tot op hede het Indigenous Film Development, ’n maatskappy met slegs vrouewerknemers wat 100% in swart besit is, reeds 130 rolprente vrygestel insluitend Liefling – Die Movie, Four Corners, Inxeba (The Wound), Racheltjie de Beer, Losing Lerato, Rafiki, Knuckle City, This Is Not a Burial, It’s a Resurrection en Barakat.

Irfaan Fredericks is die voormalige mede-eienaar van Kalahari Film and Media, ’n internasionaal erkende produksiemaatskappy wat hy vanaf 2014 tot 2021 saam met sy sakevennoot, Michael S. Murphy, bestuur het. Hulle het, onder meer, aansien verwerf as die Afrika-fasiliteerdervervaardiger van Uncut Gems met Adam Sandler, asook as die lynvervaardiger van SAF3, ’n internasionale televisiereeks met Dolph Lundgren wat deur die vervaardigers van Baywatch gemaak is. Irfaan Fredericks het reeds verskeie advertensies vir blouskyfiemaatskappye soos Coca-Cola, Toyota en Disney gemaak. Teen die einde van 2020 het Irfaan onafhanklik gewerk as vervaardiger van die Showmax-reeks Tali’s Baby Diary. In dieselfde jaar stig hy Wallflower Production om oorspronklike inhoud van Afrika vir ’n internasionale gehoor te ontwikkel.

Karin Preller is ’n Johannesburgse kunstenaar. Ná ’n kort loopbaan in die regte voltooi sy ’n MA (BK) (Cum Laude) aan die Universiteit van die Witwatersrand waarna sy in Kunsgeskiedenis by Unisa en ander tersiêre instellings doseer. Sy is tans voltyds kunstenaar en besig met ’n doktorsgraad by die Universiteit van Johannesburg. Haar werk is in verskeie versamelings opgeneem, onder meer, die Johannesburgse Kunsgalery, Sasol, Absa, Unisa, Oliewenhuis Kunsmuseum, die Pretoriase Kunsmuseum, die kantoor van die Openbare Beskermer, ATKV en Standard Bank.

Kaye Ann Williams het in 2008 by Penguin Films begin werk – aanvanklik as vryskutskrywer, maar later was sy hul hoof van ontwikkeling. Sy was die medevervaardiger van verskeie televisiereekse, insluitend Shreds and Dreams II, Zibondiwe, Stokvel en You Deserve It. Sy was die mededraaiboekskrywer en vervaardiger van die SAFTA-wenner Ingoma, ’n TV-fliek vir die Mzansi Magic-kanaal. Kaye was ook die mededraaiboekskrywer van die bekroonde speelfilm Krotoa.

Kaye het in 2015 by kykNET aangesluit, waar sy as toesigvervaardiger gewerk het aan, onder meer, die SAFTA-benoemde daaglikse drama Suidooster. Daarna het sy M-Net se senior bestuurder van opdragwerk geword. Jaar portefeulje sluit flieks in asook plaaslik geskryfde inhoud en werklikheids-TV. In 2019 het sy Trackers, ’n groot ko-produksie met HBO Cinemax en ZDFE, saam met die M-Net-span vrygestel.

Laetitia Pople is die kuns- en vermaakredakteur van Netwerk24. Sy is die afgelope 30 jaar ’n kunsjoernalis by die Afrikaanse dagblaaie. Sy het reeds op verskeie beoordelaarspanele gedien, onder meer vir die Fiëstas-, Kanna-, Silwerskermfees- en ATKV-toekennings.

Layla Swart, medestigter van Yellowbone Entertainment, is een van Suid-Afrika se mees suksesvolle vervaardigers en filmredigeerders. Layla is gekies as die enigste verteenwoordiger van die bedryfsektor vir film en kreatiewe beroepe by die 2018 President’s South Africa Investment-konferensie en sy het die 2019 SAFTA  Youth Achiever-toekenning toevang. Sy het die 2020 SAFTA vir beste redigering van ’n speelfilm gewen, en haar rolprente Sew the Winter to My Skin en Knuckle City was Suid-Afrika se inskrywings vir die Oscars in 2019 en 2020. In 2020 het sy die televisiereeks Blood Psalms vervaardig wat in Februarie 2022 op Showmax en Canal Plus te sien sal wees.

Leon van Nierop werk al 46 jaar in die vermaaklikheidsbedryf. Hy begin as radio-omroeper en regisseur by die SAUK in 1975 en skryf rolprentresensies vir radio, tydskrifte, koerante en televisie. Hy gee vir 25 jaar lank klas by verskeie universiteite in rolprentwaardering en draaiboekskryf. Tussen 2004 en 2008 is hy hoof van die TUT Filmskool as spesiale professor in Film, en skryf hy twee rolprentdraaiboeke, Wolwedans in die skemer en Ballade vir ’n enkeling. Hy bied TV-vasvraprogramme aan, vervaardig ’n TV-reeks oor die geskiedenis van die Afrikaanse rolprent, Daar doer in die fliek, en publiseer dit ook as boek. Hy het 36 romans, verskeie radiodramas asook TV-dramas en -reekse geskryf en het pas ‘n eenmanverhoogstuk voltooi.

Lieza Louw is ’n akademikus, filmmaker en navorser by Arts Research Africa, Universiteit van die Witwatersrand, en ’n deeltydse lektor by die Tshwane Universiteit van Tegnologie. Haar navorsing fokus onder meer op herinnering, nostalgie, landskapstudies, die argief en dokumentêre films. Onlangse films sluit in Like Shooting Sardines in a Barrel (2018) en St Cuthbert’s: This Is What I Like About My Place (2020).

Mandisa Zitha is die feesdirekteur van die Suid-Afrikaanse Encounters-fees vir dokumentêre rolprente. Sy is ambassadeur vir die Suid-Afrikaanse filmbedryf en is toegewyd tot die ontwikkeling van opkomende talent in die dokumentêrbedryf. Zitha het die 2020 Mbokodo-toekenning vir vroue in media ontvang. Sy het ’n sleutelrol gespeel in die bou van die vennootskappe tussen Encounters en die Sichuan-televisiefees in China (wat sewe plaaslike films en twee filmvervaardigers na ’n fees in China geneem het), die Franse Ambassade vir die eerste Suid-Afrikaanse Afridoc-skrywersresidensie (wat die ontwikkeling van dokumentêre uit Afrika ten doel het), en in 2012 die vennootskap met Al Jazeera wat 20 Afrika-dokumentêre die geleentheid gebied het om hulle werk op Al Jazeera te wys.

Marianne Thamm is ’n skrywer, redakteur en joernalis. Sy is grootgemaak in Pretoria waar sy geleer het om Afrikaans te praat en lief te hê. Sy is tans mederedakteur van die Daily Maverick.

Monica Rorvik is hoof van die film-en-mediapromosiespan by Wesgro, die Kaapstadse en Wes-Kaapse agentskap vir toerisme, handel en beleggings. Sy het voorheen gewerk as assistant-bestuurder by die Durban Internasionale Filmfees waar sy, onder meer, vir die bestuur van hulle bedryfsprogramme verantwoordelik was. Daar het sy ’n passie vir die kultivering van talent in Afrika ontwikkel en het sy ’n sleutelrol in die totstandkoming van Talents Durban in vennootskap met die Berlinale-talentprogram gespeel. Sy is ’n ervare filmprogramkurator, dien gereeld op internasionale beoordelaars- en keurpanele en is ’n deskundige op die gebied van spesialiteitsprogramme vir internasionale feeste en filmmarkte. Rorvik is ook ’n gesertifiseerde Afrika-filmkommissaris.

Nicola van Niekerk is die senior bestuurder van teksgedrewe produksies by kykNET-kanale. Sy het ondervinding in ’n verskeidenheid genres, insluitend drama, daaglikse dramas, leefstyl- en dokumentêre programme vir ’n verskeidenheid internasionale kanale en platforms.

Sy het in 2012 by die kykNET-span aangesluit as toesigvervaardiger en is later bevorder tot kykNET-hoof van produksie. Nicola is sedert 2018 verantwoordelik vir teksgedrewe inhoud en dokumentêre. Sy het onlangs die baie gewilde Devilsdorp bekend gestel – Showmax se eerste waremisdaad- dokumentêre reeks. Inhoud is haar passie en veral Afrikaanse inhoud. Sy is tans by verskeie opwindende internasionale ko-produksies asook dokumentêre met internasionale vennote betrokke.

Nomsa Philiso het omvattende uitsaai- en media-ervaring wat strek oor 26 jaar. Sy het, onder meer, etlike jare by die Suid-Afrikaanse openbare uitsaaier gewerk. Philiso is ervare in mediaverkope, kanaal- en inhoudbestuur, sowel as die implementering van tegnologie in projekte, en sy dra kennis van ‘n wye verskeidenheid teikenmarkte se gehoorvoorkeure. Sy het aangesluit by MultiChoice in Januarie 2020 as kanaaldirekteur vir plaaslike vermaak en is aangestel as die uitvoerende hoof van programme in Oktober 2021.

Salome Cromhout van Nu Metro Cinemas het ’n holistiese begrip en gespesialiseerde kennis van die filmbedryf ontwikkel in 26 jaar se ondervinding met filmverspreiding, verkope en fliekteaterbestuur. Sy het verskeie posisies beklee waarin sy, onder meer, betrokke was by die ontwikkeling en bestuur van inhoudstrategieë en -veldtogte, asook die analise van marktendense met die doel om films effektief vir gehore te teiken. Salome is tans Nu Metro se inhoudsbestuurder. Die implementering van strategie en gepaardgaande skeduleringsplanne is haar verantwoordelikheid. Dit sluit inhoud uit Hollywood, Europa, Suid-Afrika en Afrika, Bollywood en Asië in. Alternatiewe inhoud – soos sportbyeenkomste, musiekkonserte of optredes van komediante in fliekteaters – vorm ook deel van haar portefeulje.

Ná 12 jaar in verskeie operasionele rolle by Ster-Kinekor, het Tanya Rossouw geskuif na hulle inhoud- en programspan as organiseerder waar sy die laaste ses jaar werksaam was. Haar hooffokusareas sluit in filmkringloopbeplanning, skedulering en administrasie.

Thandeka Zwana het in 2018 as direkteur vir ontwikkeling aangesluit by Indigenous Film Distribution met die doelwit om die katalogus uit te brei van dié maatskappy wat bekend is vir sy sukses met die verspreiding van plaaslik vervaardigde rolprente. Sy het in 2004 begin werk in die filmbedryf en is in produksie aangestel by DV8, waarna sy etlike jare as vryskutvervaardiger vir verskeie bekroonde televisiereekse en rolprente gewerk het, onder meer, Robert Sobukwe: A Great Soul. Na voltooiing van die SEDIBA-kursus in draaiboekredigering, is sy in 2011 deur die Nasionale Rolprent-en-video-stigting genader  om deel te word van die span wat verantwoordelik is vir die ontwikkeling en promosie van Suid-Afrikaanse films, plaaslik en internasionaal.

Thandi Davids het meer as 25 jaar ervaring in media. Sy het haar loopbaan begin as reklamebeampte en het later na produksie van regstreekse televisie-uitsendings geskuif. Sy het gewerk in die drukkersafdeling van media asook saam met die Verenigde Nasies aan die aanbieding van groot byeenkomste en geleenthede. Sy is ’n bekroonde bemarker en het haar eie bemarkingsagentskap met sowel plaaslike as internasionale kliënte bestuur. Sy het gewerk as die Afrika-streeksdirekteur vir Fox International en is een van die stigtingsvennote en tans uitvoerende direkteur van StoryScope. Thandi is medevoorsitter van die IPO (Independent Producers Organisation) en dien op die raad van beide die Durban Film Mart en die Lionel Ngakane-stigting.

Thierry Cassuto is die stigter en hoof- uitvoerende beampte van die produksiemaatskappy Both Worlds. Sy internasionale loopbaan in televisie en film strek oor 30 jaar as ateljeehoof, kanaaldirekteur, skrywer en vervaardiger. Hy het die kuns- en vermaakkanaal Paris Première gestig en was stigtingsdirekteur by M6, voor hy begin werk het by die Hollywood-animasie-ateljee Hanna-Barbera as president vir Franssprekende lande. As vervaardiger in Frankryk en vir meer as 20 jaar in Suid-Afrika, het Thierry reeds 100 ure se draaiboekgedrewe, asook animasie sonder draaiboek vir televisie vervaardig, insluitend die tweemalig Emmy-benoemde en meermalige SAFTA-wenner ZANEWS: Puppet Nation. Ander programme sluit in Point of Order vir StarTimes, Parlement Parlement vir kykNET, en Comedy Central News vir ViacomCBS.

Todd Brown is ’n ervare filmfeesprogramkoördineerder en stigter van die internasionale en onafhanklike filmwebblad ScreenAnarchy.com (oorspronklik TwitchFilm.com). Hy het begin werk by XYZ Films in 2009 as hoof van internasionale aankope. In die jare by XYZ het Brown hom veral op opkomende talent toegespits en gewerk as vervaardiger en uitvoerende vervaardiger van rolprente wat by Cannes, Toronto en Sundance gewys het soos The Raid, Spring, Bushwick, XX en vele ander. Buiten sy werk by XYZ, is Brown ook die hoof van die Macao Project Market – ’n internasionale ko-produksiemark wat fokus op projekte wat die gaping tussen die Ooste en Weste oorbrug, en deel vorm van die Macao Internasionale Filmfees en Toekennings.

Vlokkie Gordon, hoof- uitvoerende beampte van Advantage Entertainment, het ’n loopbaan wat strek oor 35 jaar in die vermaaklikheidsbedryf. Sy het meer as 58 rolprente, televisie-rolprente en -reekse agter haar naam en is een van Suid-Afrika se voorste lynvervaardigers. Sy is dus ’n gewilde keuse vir produksie-supervisie van internasionale en Suid-Afrikaanse produksies. Haar span bestaan uit van Suid-Afrika se mees kundige bestuurders, tegnici en produksiepersoneel.

Wikus du Toit is ’n toesigvervaardiger by M-Net en is verantwoordelik vir film, drama, komedie asook internasionale ko-produksies. Hy het ’n meestersgraad in Drama en ’n tweede MA in Tersiêre Onderrig en ’n tweede meestersgraad in Volwasse Opvoedkunde met ’n spesifieke fokus op die bevordering van kritiese denke en kreatiwiteit in film, TV en teater. Hy is ook ’n uitvoerende vervaardiger van meer as 15 Afrikaanse films, insluitend Toorbos, Barakat, Gaia, Fiela se kind en Griekwastad.

Wouter Jansen is ’n Berlinale Talent-alumnus wat gewerk het as hoof van programmering by die Go Short Internasionale Filmfees tydens die eerste tien feeste. Hy is die eienaar van Square Eyes, ’n onderneming wat daarin spesialiseer om vir uitstaande nisrolprente die gehoor en erkenning te verkry wat dit verdien. Met Square Eyes verteenwoordig Wouter sterk teksgedrewe rolprente en kort opnames, en werk hy nou saam met die vervaardigers aan feesverspreiding en verkoopstrategieë. Op dié manier het hy daarin geslaag om ’n klein katalogus rolprente op die programme van gesogte filmfeeste te kry. Van hierdie rolprente het oor die laaste paar jaar verskeie toekennings by feeste soos Cannes, TIFF, Berlyn, Locarno en Clermont-Ferrand ingepalm.