Meer oor ons

Welkom

Nkateko Mabaso, Hoof- uitvoerende beampte: M-Net

In hierdie onseker tye wend ons ons tot die kreatiewe bedrywe om ons te help om te kontekstualiseer, te bevraagteken en sin te maak van die wêreld om ons. Ons vermoë om aan te pas en te innoveer bepaal hoe ons die toekoms sien.

Ons is trots op die gehalte van ons plaaslike produksies. Die feit dat ons speelfilms ook in die internasionale arena erkenning kry, getuig van uitnemendheid. M-Net is en sal altyd daartoe verbind bly om die stories te vertel van die gemeenskappe in wie se diens ons staan.

Die kykNET Silwerskermfees is geskep nie alleen om ’n platform aan plaaslike talent te bied nie, maar ook om die fondamente te lê vir loopbane in die film- en TV-bedryf. Ons sien uit daarna om gedurende hierdie webinaar in gesprek te tree met internasionale vennote en om uit hierdie interaksie inspirasie te put en te groei as gevestigde globale spelers op die kontinent van Afrika.

Karen Meiring, MNET: Direkteur van kykNET-kanale

Tien jaar gelede het ons na nuwe, volhoubare maniere gesoek om vars, opwindende talent en inhoud vir kykNET te vind. Die idee van die kortfilmkompetisie is gebore en die eerste kykNET Silwerskermfees is in Augustus 2011 in Prins Albert geloods.

Die Silwerskermwebinaar 2020 is die begin van ’n groter, volhoubare gesprek met inhoudsvervaardigers en filmmakers oor genres, formate en platforms heen om nuwe landskappe en ruimtes te verken en te ontgin.

“Geen grense” sou ’n goeie tema vir ons eerste webinaar wees – geen grense tussen lande, denke, formate of bedrywe nie; ’n geleentheid waarop ons in nuwe vennootskappe kan voortbou.

Ons wil hiermee ook SilwerSkermgeSprekke/SilverScreentalkS vestig as ’n gereelde instelling op ons webwerf.

Daar is immers altyd behoefte om te deel en verder te gesels, want só word ’n toekoms geskep deur aan oorspronklike idees te herkou en implementeerbare konsepte te ontwikkel.

Ons verwelkom al ons internasionale deskundiges, Dorothee Wenner en Kisha Imani Cameron, al ons paneellede en al die fasiliteerders wat aan vanjaar se webinaar deelneem. Baie dankie vir julle entoesiasme en bereidheid om julle kundigheid te deel.

Daar is eindelose potensiaal vir Afrikaanse films en inhoud, juis omdat dit outentiek en verteenwoordigend is van ’n diverse Suid-Afrikaanse gemeenskap gewortel in ’n unieke Afrikataal.

Ons is baie opgewonde oor ons eersteling en sien uit na die kroos wat gaan volg.

Geniet die eerste Silwerskermwebinaar en benut die netwerkgeleenthede wat dit bied, ten volle.

Jan du Plessis, MNET: Direkteur van M-Net-kanale

In Februarie 2020 het die rolprentwêreld sy rooi tapyte oopgerol vir ’n roemryke jaar. Ja, draai die horlosie net ’n paar maande terug: Bong Joon Ho se Suid-Koreeanse meesterstuk Parasite het die wêreld in vervoering. Dis vars, vindingryk, ryg die een ná die ander internasionale toekenning in, maak skoonskip by die Oscars en herskryf selfs die geskiedenis as die eerste buitelandse, anderstalige wenner in die Beste film-kategorie. Op dieselfde verhoog laat nog ’n baanbreker die vreugdevure aan die fliekfront hoog brand toe hy sy beeldjie (vir Beste draaiboekverwerking) opdra aan alle inheemse kinders wat wil sing, dans en stories skryf. Taika Waititi is die eerste persoon van Maori-herkoms om ’n Oscar op te raap.

Dié suksesverhale is goeie nuus vir filmmakers van oraloor – almal droom groot en glimlag breed. Maar nou, steeds in 2020, verskans maskers ons emosies.

Die pandemie het onverbiddelik die “pause”-knoppie gedruk op grootskaalse Hollywoodprojekte en ’n rits beplande plaaslike M-Net-flieks. Terwyl die blote maak van ‘n rolprent tans gepaard gaan met allerlei nuwe struikelblokke agter die skerms, wonder ’n mens hoe die bedryf in sy geheel in die toekoms gaan lyk – twee, vyf, tien, twintig jaar van nou af.

Nou is dit tyd vir oopkop wees. Met ’n goeie skeut kreatiwiteit, verbeeldingskrag én chutzpah kan ons aanhou om ons stories te vertel. Dalk selfs beter. In die vroeë 1920’s het gehore immers tou gestaan vir die eerste “talkies”. Nou reik ons plaaslike flieks, soos Griekwastad en Knuckle City, direk op DStv BoxOffice uit – en kykerrekords spat.

Fliekmaak is nou eenmaal ’n spansport, en M-Net bly elke speler se grootste ondersteuner. Ons hoop dat hierdie virtuele skouers skuur, sal sorg vir blink nuwe idees vir die pad vorentoe. Want ons stories móét vertel word.

Ricky Human, Programhoof: kykNET Silwerskermwebinaar

Toe die pandemie toeslaan en ons planne vir die 10de Silwerskermfees omverwerp, het ons besluit om die “pause”-knoppie te druk en ons heel eerste kykNET Silwerskermwebinaar aan te bied. In ’n tyd waarin filmmakers oral onsekerheid trotseer, het ons die webinaarprogram gebou rondom internasionale gassprekers en plaaslike filmmakers wat gretig is om hul kennis te deel in werkswinkels en besprekings oor kwessies soos internasionale filmverspreiding, finansiering en na-produksie. Daar is ook ’n spesiale opleidingsessie oor hoe om jou projek onder vervaardigers se aandag te bring en in die Pitch to Us-sessie kry jy die geleentheid om jou beste, blinkste idees aan ons te verkoop.

In die nuwe normaal besef ons opnuut hoe belangrik dit is om by bedryfsleiers dwarsoor die wêreld kers op te steek. Saam kan ons die toekoms van jong en opkomende filmmakers vorm en kan ons die gedeelde uitdagings van die groter filmbedryf verken en die hoof bied.

In die gees van die Silwerskermfees is daar ook opwindende filmvertonings op die webinaarprogram. Jy kry die eerste geleentheid om premières in verskeie formate op ’n digitale platform te beleef en ook om te hoor wat die betrokke filmmakers oor hul werk en skeppingsproses te sê het.

Die eerste Silwerskermwebinaar beloof om ’n stimulerende, inspirerende ervaring te wees. Sluit by ons aan en leer hoe om hierdie uitdagende tyd te omhels.

Ons vennote

If location is everything, Cape Town and the Western Cape have it all. Think towering mountains and rolling waves, bustling cityscapes and desolate landscapes, and much more. Some of the most popular locations in the Western Cape are found in Cape Town’s central business district, with a variety of urban looks and various types of architecture, as well as stunning natural beauty. We are so diverse that almost any country in the world can be replicated within a two-hour radius of Cape Town. The only limit is your imagination.

Die doel van Dagbreek Trust is die bevordering van die Afrikaanse taal en kultuur. Ons bewerkstellig dit deur kernbefondsing en projekbefondsing wat Afrikaans in sy volle diversiteit (oor rassegrense heen) bevorder met instellings wat hulle as betroubare vennote bewys. Ons visie is die volhoubare gebruik van Afrikaans deur ondersteuning van projekte wat die historiese bewussyn van Afrikaans, taalgemeenskaplikheid en konstruktiewe posisionering van die Afrikaanse taal aanmoedig.

Die span