Films vars van die Silwerskermfees af eersdaags op kykNET

Die laaste springmieliekrummels is skaars opgevee ná die 2025 Silwerskermfees, maar kykNET-kykers kan hulle reeds regmaak om die kortfilms te sien wat vanjaar by die fees debuteer het.

Die kortfilms, wat drama, komedie en dokumentêre insluit, begin reeds op Sondagaand 31 Augustus om 20:00 met drie dokumentêre.

Vet vannie land is ’n kort dokkie wat die briljante botanis Pieter van Wyk se spoor volg terwyl hy probeer om een van ons land se uniekste ekosisteme teen ineenstorting te beskerm. Bliksems in Bothaville handel oor die lewe van die rofstoeier Roger Wilters. Met sy persoonlike lewe gaan dit droewig, en die huis wat eens vol gesinslede was, is nou stil. Dit was in die kryt waar Roger homself kon uitleef en vergeet van sy probleme – totdat die enigste rofstoeiklub in Bothaville toegemaak het. GHAM! Ons het lyn is ’n intieme kykie na die wêreld van die Temple Boys van Ravensmead wat drie jaar ná hul TikTok-roem worstel met drome wat vervaag het.

Op Saterdag 6 September is daar vier kortfilms vanaf 20:30 te sien.

Totsiens, Selina vertel die verhaal van Selina, die vrou wie se vertroostende teenwoordigheid in die Swanepoel-huishouding vir jare as vanselfsprekend aanvaar is. Met Clementine Mosimane, Lorraine Burger, Maki Mokhitli, Francois Lensley en Erasmus Esterhuizen. Die familiekomedie-drama Kinnetafel se lokreël sê dit alles: “Geheime aan tafel, messe in die rug.” In die rolverdeling is Braeden Buys, Lauren Joseph, Melanie du Bois, Veronique Jephtas, Euodia Samson en Royston Stoffels. In Bly woed ’n storm buite terwyl ’n bejaarde egpaar, vertolk deur Anton Dekker en Karin Retief, se plan om hul lyding te beëindig, begin ontrafel wanneer hul kleindogter, gespeel deur Liza du Plessis, in lewensgevaar beland. In ARK bevind Noa (Ben Albertyn) en Mira (Kristen Raath) hulle in ’n ruimtetuig na Mars. Die voortbestaan van die mensdom hang van hulle twee af, maar daar’s baie bagasie wat ’n mens op pad na ’n nuwe begin saamdra. Gaan Noa en Mira hul sending kan voltooi?

Op Sondag 7 September is daar twee dokumentêre vanaf 20:00 te sien.

Tussen Hemel en Aarde handel oor die ondenkbare hartseer wat die Springbok-rugbyspeler Jannie du Plessis en sy vrou, Ronel, op 16 November 2021 beleef het: die verdrinking van hulle tien maande oue babaseuntjie. Felix by die koppie bied ’n persoonlike blik op die gebeure tydens die Marikana-slagting soos gesien deur die oë en lens van die bekende fotojoernalis Felix Dlangamandla.

Vanaf 20:30 op Saterdag 13 September is daar drie kortfilms op die spyskaart.

Alma op pad verken die impak van besluite wat geneem word wanneer dinge skielik verander. Die 12-jarige Alma (Chrystal Conradie) se ma wil van die gesin se jarelange tradisionele vakansiebestemming wegbreek. Sy smag na iets anders, maar haar man is glad nie gelukkig met die idee nie. Ook met Laudo Liebenberg, Amalia Uys en Gerhard Conradie. Tussen die kwashale handel oor die 11-jarige Tyron (Jihad Otto) wat sy kunssinnige ma, Anna (Monique Rockman), aan die dood afstaan. Tyron is outisties en hy vind troos deur te skilder. Min of Meer is die storie van Jana wat begeer om ’n meermin te wees en haar geliefde man, Jakob, wat haar droom ten alle koste moontlik wil maak. Met Liezl de Kock, Tiaan Slabbert, Neels Clasen, Zak Hendrikz en Craig Urbani.

Op Sondag 14 September om 20:00 wys twee dokumentêre.

Verander volg die emosionele en politieke reis van Lourens Jacobs, voormalige sekuriteitshoof van president Nelson Mandela. Dit werp lig op wie Lourens was voor Suid-Afrika se oorgang na demokrasie in 1994 en ondersoek sy rol in ’n tyd van politieke spanning en verdeeldheid. Jan Bloed is ’n kort dokumentêre rolprent oor ’n voormalige bendelid van Westbury. Sy regte naam is Alister Fortuin, maar as Jan Bloed was hy eens ’n lid van die Fast Guns en ook van die Varados-bende. Alister deel sy lewensverhaal en vertel meer oor sy kinderdae, sy familie en die bendelewe.

20 September vanaf 20:30 is dit tyd vir die laaste drie kortfilms.

In Sewe is Michelle (Karlé Briedenhann) vasgevang in ’n verhouding wat al hoe meer manipulerend en gewelddadig word. Tog kan sy Francois (Viljé Maritz) “nie net los nie”. Die Superette is ’n aksie-komedie wat in ’n hoekkafee afspeel. Tannie Sonja (June van Merch) is die vlymskerp kassier en wanneer twee gemaskerde rowers, Bompie en Lange, inbars en geld eis, ontaard die situasie in ’n gyselaarsdrama. Ook met Dirk Stoltz, Marunzo Thomas en Tyron McKinnon. Hier het David Viviers en Anja Taljaard in die hoofrolle, en hulle karakters se lewens oorvleuel met mekaar oor ses generasies heen in hierdie kortfilm waarin romanse, wetenskapsfiksie, aksie en drama met iets bitter onheilspellends opgeklits word.

Die speelfilm My f*k, Marelize! word op 29 Augustus in teaters landwyd asook in Namibië vrygestel. Hou kykNET se platforms dop vir nuus oor die vrystelling van die ander speelfilms.

Die skedule is as volg:

31 Augustus

20:00 Vet vannie land

20:30 Bliksems in Bothaville

21:00 GHAM! Ons het lyn

6 September

20: 30 Totsiens, Selina

20:55 Kinnetafel

21:15 Bly

21:40 ARK

7 September

20:00 Tussen Hemel en Aarde

20:45 Felix by die koppie

13 September

20:30 Alma op pad

21:00 Tussen die kwashale

21:30 Min of Meer

14 September

20:00 Verander

20:45 Jan Bloed

20 September

20:30 Sewe

21:00 Die Superette

21:30 Hier

 

  • Die kortfilms en dokumentêre films is te sien op kykNET (DStv-kanaal 144) en sal ook op DStv Stream en Catch Up beskikbaar wees.