Welkom

Die kykNET Silwerskermfees is ’n hoogaangeskrewe Suid-Afrikaanse en Afrikaanse film- en inhoudsfees wat die plaaslike bedryf al vir die afgelope 12 jaar ondersteun, bemagtig en ontwikkel. Die fees het bewys dat dit ’n belangrike platform vir sowel gevestigde as opkomende filmmakers is. Saam met die wêreld- of Suid-Afrikaanse premières van die jongste rolprente, vertoon die Silwerskermfees die werk van jong talent in ’n reeks diverse kortfilms wat met die fees se finansiële ondersteuning en mentorskap vervaardig is. Die propvol feesprogram sluit paneelbesprekings, werkswinkels en bedryfsgerigte meesterklasse in wat deur bekende plaaslike en internasionale kenners aangebied word. Die gesogte Silwerskermtoekennings vir Film en Televisie vereer uitstaande prestasies.

Twee nuwe feesinisiatiewe in 2024 is die Shotgun-kortfilms en die uitbreiding van die Silwermark. Die Shotgun-kortfilms is die werk van ervare filmmakers wat daarop gemik is om gehore te roer en opkomende talent te inspireer. Die Silwermark bied die geleentheid vir inpersoonvoorleggings by die fees aan beide kykNET en Showmax in ’n verskeidenheid van Afrikaanse inhoudskategorieë.

Sedert die begin van die geskiedenis was stories noodsaaklik vir mense om sin van hul bestaan te maak. Met die Silwerskermfees in Kampsbaai word oorspronklike Suid-Afrikaanse stories gekoester en gevier.

Ons bly verbind tot die volgende doelwitte:

• Die uitbou van die Suid-Afrikaanse film- en TV-bedryf

• Ontwikkeling van gehore

• Opleiding en mentorskap

• Bevordering van plaaslike inhoud, nasionaal en internasionaal

• Sosiale kohesie en gesonde diskoers

Geniet asseblief die fees, die stories en alles wat die pragtige Kampsbaai bied.

Silwerskerm-inisiatiewe

SILWERMARK

Elke jaar kry storievertellers in ’n verskeidenheid videovermaakgenres die geleentheid om ’n konsepvoorstel in ’n spesifieke kategorie in te skryf. Aansoeke word dan gekies om ’n inpersoonvoorlegging aan ’n paneel opdraggewende besluitnemers by die Silwerskermfees te maak. Die verkiesingsproses word deur M-Net se toesigvervaardigers gedryf wat in die verskeie kategorieë kundig is.

Die konsepte vir nuwe films, televisie- en stroomdiensprogramme moet in een van die volgende kategorieë wees en aan die dialoogvereiste van 70% Afrikaans voldoen:

1. kykNET Drama
2. kykNET Realiteit en vermaak
3. kykNET Dokumentêr
4. Afrikaanse speelfilm
5. Showmax Wild Card-kategorie
6. kykNET Adverteerde-geborgde programme (AFP)

Aansoeke in die laasgenoemde kategorie vir Adverteerder-geborgde programme sluit 5 Julie.

KORTFILMPROJEK – Opkomende filmmakers

Die Silwerskermfees-kortfilmprojek bied opkomende filmmakers die geleentheid om kortfilms te ontwikkel en te vervaardig met die finansiële steun en mentorskap van die fees. Hierdie inisiatief het ’n lanseerplatform gebied aan talle nou bekende filmmakers om die bedryf te betree en hulself te vestig. Die projek het oor die afgelope paar jaar eksponensieel gegroei en het uitgebrei na verskeie kortfilmkategorieë.

KORTFILMPROJEK – Gevestigde filmmakers

Die Shotgun-kortfilmprojek, wat gevestigde filmmakers befondsing en ’n geleentheid bied om hul vakmanskap ten toon te stel, skop hierdie jaar af. ’n Voorwaarde vir deelname aan hierdie kategorie is voortaan dat die filmmakers ook minder ervare spanlede moet mentor en ’n nuweling in hul rolverdeling moet insluit.

KORT DOKUMENTÊRE FILMS – Opkomende filmmakers

Dié filmprojek bemagtig nuwe filmmakers om ware verhale te vertel deur kort dokumentêre van onder ’n halfuur te ontwikkel en te vervaardig. Dis ’n projek wat uit die staanspoor suksesvol was en vlugtig uitgebrei het om ’n hele nuwe genre vastrapplek in die feeslandskap te gee, met Silwerskermtoekenningskategorieë wat uitmuntende prestasies vier.

KORT DOKUMENTÊRE FILMS – Gevestigde filmmakers

Vanjaar is inskrywings oopgemaak vir meer ervare filmmakers wat in die dokumentêre veld werk, om konsepte in te dien vir keuring, befondsing en vertoning by die Silwerskermfees in 2025. Die eerste suksesvolle groep van hierdie eksklusiewe kategorie sal vanjaar by die Silwerskermtoekennings vir Film en Televisie by The Bay Hotel aangekondig word.

SPEELFILMS

Oorspronklike draaiboeke en boekverwerkings het Silwerskermgehore oor die afgelope twaalf jaar bekoor in die opwindende afdeling vir speelfilms. ’n Jaarlikse hoogtepunt van die fees is hierdie rolprent-ervarings, geskep deur die room van die plaaslike bedryf in ’n verskeidenheid van filmgenres wat fokus op eg Suid-Afrikaanse verhale.

TELEVISIE- EN STROOMDIENS-INHOUD

Sedert 2023 sluit die Silwerskermfeesprogram ook voorskoue van opwindende nuwe televisie- en stroomdiens-inhoud in. Dit beteken dat die kontemporêre Afrikaanse filmkuns nou in al sy gedaantes gehuisves, gestimuleer en gevier word by die unieke netwerkgeleentheid wat die fees bied. Dokumentêre, loodsepisodes van dramareekse en realiteits- en vermaaklikheidsprogramme word vertoon, en hierdie TV-storievertellers geniet die glans en swier van die fees saam met hul eweknieë in die filmbedryf.

kykNET SILWERSKERM-TOEKENNINGS VIR FILM EN TELEVISIE

Die Silwerskermtoekennings vir Film en Televisie het uitgebrei na twee gesogte prysuitdelingsgeleenthede wat uitmuntende prestasies, beide agter en voor die kamera, in 50 toekenningskategorieë vereer. Die geleenthede word onderskeidelik by The Bay Hotel en die CTICC op Saterdag 31 Augustus aangebied, en die glansryke aandtoekenningsgeleentheid sal op kykNET uitgesaai word.

Beoordeelaars

Rafiek Mammon het ’n meestersgraad in Opvoedkundige Filosofie van die Universiteit Stellenbosch. Hy was die kunsredakteur van die Cape Times en is ’n voormalige beoordelaar van die Fleur du Cap-teatertoekennings. Mammon dien op verskeie ander beoordelaarspanele en word gereeld as teksleser vir kunstefeeste reg oor die land ingespan. Hy is daarbenewens ’n bekroonde dramaturg en is by verskeie teaterontwikkelingsprojekte betrokke. Rafiek skryf graag en behartig gereeld die regie vir toneelstukke. Hy was vir etlike jare ’n dosent in die Joernalistiek by CPUT en was vir vier jaar ’n lektor aan die Universiteit van Kaapstad. Tans gee hy klas by die Universiteit Stellenbosch en werk as ’n vryskutdramaturg, konsultant en resensent.

Leon van Nierop is ’n veelbekroonde skrywer, TV-aanbieder, resensent, regisseur, rolprentnavorser, vervaardiger en dosent. Hy is reeds 48 jaar in die bedryf en het hom aanvanklik onderskei as omroeper by die SABC. Van Nierop lewer resensies vir verskeie platforms en het die draaiboeke vir Ballade vir ’n enkeling en Wolwedans in die skemer geskryf. Hy het vir 20 jaar rolprentontleding by die Technikon Pretoria aangebied, en was vir vier jaar hoof van die Rolprentakademie by die TUT, waar hy ’n volle professor was. Leon het 37 romans geskryf en vier akademiese boeke, waaronder Movies Made Easy, Druk speel en Seeing Sense: On Film Analysis. Hy was ook vir Daar doer in die fliek verantwoordelik – sowel die handleiding in boekformaat as die dokumentêre kykNET-reeks. Hy het onlangs Het van Verlangekraal in ’n moderne roman verwerk en skryf tans aan Op die oog af – ’n radioverhaal vir RSG wat in ’n skool vir blindes afspeel waarvan hy ook die regie behartig.

Kaye Ann Williams het aan die Universiteit van Kaapstad ’n BA in Filmproduksie en Mediastudies verwerf. Aan die begin van haar loopbaan was sy vir meer as tien jaar ’n draaiboekskrywer, vervaardiger en storie-skepper voordat sy as toesigvervaardiger by MultiChoice begin werk het waar sy later tot die hoof van plaaslike produksies, onafhanklike rolprente en internasionale ko-produksies bevorder is. Daarna het sy by die Prime Video & Amazon Studios-span aangesluit as hoof van draaiboekgedrewe reekse en rolprente in Suid-Afrika. Sy is nou Visepresident: Inhoud by Primedia Studios. Kaye Ann is ’n ervare storielynskepper, draaiboekskrywer en -redakteur, maar geniet ook die fasilitering van die kreatiewe proses binne dinamiese skrywerspanne. Sy het wydlopende ervaring in die uitsaaiwese en as vervaardiger. Sy verstaan die eise wat beide hierdie aspekte van die kreatiewe proses stel. Kaye Ann is passievol oor die storievertelkuns, storie-ontwikkeling en die kultivering van produktiewe ruimtes vir samewerking binne hierdie dissiplines.

Nico Scheepers is ’n skrywer, regisseur en dramaturg van Kaapstad. As skrywer-regisseur het Nico twee TV-reekse agter sy naam: die veelbekroonde familie-sage Nêrens, Noord-Kaap en die misdaad riller-reeks Donkerbos. Laasgenoemde is die enigste reeks uit Afrika wat gekies is vir die 2023 Berlinale Series Market. Sy fantasie-kortfilm Die maan val bewusteloos het aan hom die toekenning vir Beste regisseur by die 2017 Silwerskermfees besorg. Hy werk tans aan twee nuwe reekse en die ontwikkeling van sy eerste speelfilm. As dramaturg is Nico se werk gepubliseer in Suid-Afrika, opgevoer by die Fugard-teater in Kaapstad, die Markteater in Johannesburg, en by Aan De Braak in Amsterdam. Hy het al vyf Fiësta-teaterpryse gewen en in 2018 die Fleur Du Cap-toekenning vir Beste nuwe regisseur. In 2023, het Nico vir Donkerbos die SAFTA vir Beste regisseur ontvang, asook die Suid-Afrikaanse Akademie Vir Wetenskap en Kuns se Deleen Bekker-prys vir Beste TV-draaiboek.

Silwerskermfeesspan